స్పోర్ట్స్ బైక్ పై నుంచి పడిపోయి అపస్మారక స్థితిలోకి
అతివేగం వల్లనే ప్రమాదం
హైదరాబాద్‌: ‘మెగా’ నటుడు సాయిధరమ్ తేజ్ రోడ్డు ప్రమాదానికి గురయ్యారు. శుక్రవారం స్పోర్ట్స్ బైక్‌పై ప్రయాణిస్తున్న ఆయన ప్రమాదవశాత్తూ కిందపడిపోయారు. ఈ ఘటనలో సాయిధరమ్ తేజ్‌కు తీవ్రగాయాలు అయ్యాయి. ప్రమాదం జరిగిన వెంటనే సాయితేజ్‌ అపస్మారక స్థితిలో వెళ్లినట్లు తెలుస్తోంది. నగరంలోని కేబుల్‌ బ్రిడ్జ్-ఐకియా సమీపంలో ఈ ప్రమాదం జరిగింది. ఘటన గురించి తెలుసుకున్న పోలీసులు హుటాహుటిన ప్రమాద ప్రాంతానికి చేరుకుని, చికిత్స నిమిత్తం సాయిధరమ్ తేజ్‌ను ఓ ప్రైవేటు ఆస్పత్రికి తరలించారు. ప్రస్తుతం ఆయనకు చికిత్స కొనసాగుతోంది. బైక్‌పై వేగంగా వెళ్లడం వల్లే ఈ ప్రమాదం జరిగినట్లు పోలీసుల ప్రాథమిక విచారణలో తేలింది. బైక్‌ను నియంత్రించలేక అదుపుతప్పి కిందపడిపోయినట్లు మాదాపూర్‌ సీఐ తెలిపారు. అంతర్గతంగా ఏమైనా గాయాలు అయ్యాయా? అన్న అనుమానంతో సాయిధరమ్ తేజ్‌కు వైద్యులు స్కాన్‌ చేస్తున్నారని, ప్రమాద వార్తను కుటుంబ సభ్యులకు తెలియజేసినట్లు సీఐ వివరించారు. మాధాపూర్ లో కేబిల్ బ్రిడ్జ్ పైన ప్రయాణం చేస్తుండగా ఈ ప్రమాదం జరిగింది. శుక్రవారం రాత్రి గం. 7.45ల ప్రాంతంలో ఈ ప్రమాదం జరిగిందని డీసీపీ వెంకటేశ్వర్లు తెలియజేశారు. ఎనిమిదింటికల్లా ఆస్పత్రికి తీసుకొని వచ్చారు.
ముప్పయ్ నాలుగు సంవత్సరాల నటుడికి తలపైనా, ఛాతిపైనా, చేతులపైనా గాయాలు అయ్యాయని వైద్యులు చెప్పారు. ఈ వార్త తెలిసిన వెంటనే మెడీకవర్ ఆస్పత్రికి మెగా స్టార్ చిరంజీవి, ఆయన సోదరుడు పవన్ కల్యాణ్, సాయిధరమ్ తేజే తమ్ముడు, సినిమా నటుడు వైష్ణవ్ తేజ్, సినిమా నిర్మాత అల్లు అరవింద్ హుటాహుటిన వెళ్లారు. అనంతరం తేజ్ ను జూబిలీ హిల్స్ అపోలో ఆస్పత్రికి తరలించే అవకాశం ఉంది. సాయి దర్మ తేజ్ మెగాస్టార్ చిరంజీవికి మేనల్లుడు.
