నీకు దగ్గరగా

అక్కడ నీవు ఇక్కడ నేనైనా

ఎప్పుడు నీవు నాకు దగ్గరే

నన్ను ఉక్కిరి బిక్కిరి చేస్తూ నీ శరీర సహజ సుగంధం,

నన్ను వెచ్చగా తాకుతూ నీ ఊపిరి,

చేరువగా,  మరింత చేరువగ

మెత్తగా హత్తుకొంటున్న నీ సుకుమార  స్పర్శ ,

నా  ఆత్మను  పలకరిస్తున్న  నీ  ఆత్మ ,

అతి సమీపంలో జంకుతూ  వణకుతూ ముందుకు

చేరువవుతున్న నీ  రెండు తీయని  అధరాలు …

నా నడత నాకే తెలియని  విచిత్రం ,

అదేమిటో,  అదెలాగో తెలియదు కానీ

ఎండమావిలో నీరు తాగుతాను,

సుదూర విహారి నిండు చందమామ ను

ముద్దాడతాను,  నా రోజులు ఎలా గడుస్తున్నాయో

మరచిపోతాను…నీ తీయని ఆలోచన ల వెచ్చదనంలో.

ఇది కల్పితకల్పన గా అనిపిస్తుంది

…  నా నిజం,  ప్రేమ తర్కానికి అందదు మరి

నా హృదయం కాలాన్ని దూరాన్ని లెక్క చేయదు

ఏమో నేను పిచ్చి వాడినేమో?

ఏం నేనొక్కడినే నా ఇలా… ఉంటారు వేలకొలది స్వప్న జీవులు

అయినా ఎవరు  చెప్పలేరు ఈ వ్యసనపు ఆనుపానులు.

Also read: నిశ్శబ్ద గీతిక

Also read: కర్మ ఫలం

Also read: జ్ఞాపకాలు